ورطه خطيره

الشعب المصرى فى ورطه خطيره..وما يلى تلخيص لاسبابها من وجهة نظرى المتواضعه:-

- فتنه طائفيه تتنامى وتسيل لها الدماء كل يوم والتانى.

- إخوان وسلفيون ضد ليبراليين وعلمانيين وشيوعيين وووو... بقينا فرق وعشائر

- ناس بتقول الجيش والشعب إيد واحده..وناس بتلعن أم المجلس العسكرى الموقر.

- مدنيين بيتحاكمو أمام المحاكم العسكرية..وحراميه ومحرضين بيتحاكموا مدنى.

- ناس لسه بتقول اسفين ياريس : آه والله صحيح  .. فيه ناس لسه بتقول كده!!. وناس عايزينه يتعلق من لغاليغو هو وسوزى وجيمى.

- الشرطه والجيش بيقفوا يتفرجو على كل مصيبه والتانيه.. وبعد مالناس تخلص على بعضها .. يتدخلوا .. سياسه قديمة حقيرة لإذلال المصريين.

- الجيش بيقبض على النشطاء السياسيين وبيحاكم بثينه كامل بتهمة التحريض .. بالونة اختبار للناشطين .. والقادم شكله سوااااد.

- الإخوان عايزين الدنيا تمشى للإنتخابات ولو على جثث الابرياء طالما مش مالأهل والعشيرة .. تولع ما دامت مصلحتهم ماشيه .. وكله بالحب.

- السلفيين بيهتفوا إسلامية إسلامية .. وأختى اتخطفت .. ولا تعايش مع الاقباط .. منهج حياة .. والباقى فى نار جهنم طالما مش معانا فى الصفقة.

- الليبراليين ونخبة اليسار .. الكعب العالى .. المتعلمين فى بلاد بره .. ومش هننزل بمستوانا لباقى الشعب الجهله .. تويتر والفيسبوك هما الوطن وغيرهما عفن.

- مليونيات كومبو .. يعنى نطلع التحرير كل جمعه ، وهناك نقرر احنا جايين ليه!! "فلسطين - وحدة وطنية - ضد الطائفية - وفاء للجيش - دم الشهيد - آسفين يابن الكلب -  "آسفين مع فرنش فرايز وكانز لو تحب".

- دكاتره عاملين اعتصام .. ومسيحيين عايزين حقنا .. وسلفيين عايزين أختنا .. وليبراليين عايزين الشعب يتعلم تويتر .. وإخوان عايزين يحكموا .. والشرطه بتتدلل على البشر .. والجيش هيحكمنا عسكرى بالعافيه؟

حد يحب يزود حاجه؟؟؟

فى النهايه ... عروستى؟!!!...

اللى هيحل الفزوره هيحكم البلد .. أو هيدخل السجن؟


5 مايو، الساعة 07:12 مساءً‏ - القاهرة